Pas caktimit të 7 qershorit si datë për mbajtjen e zgjedhjeve të parakohshme parlamentare nga ushtruesja e detyrës së Presidentes, Albulena Haxhiu, në konsultim me partitë politike, Komisioni Qendror i Zgjedhjeve pritet që nesër të marrë vendimet e para për organizimin e procesit zgjedhor.

Lajmin e ka konfirmuar zëdhënësi i KQZ-së, Valmir Elezi.

“Pas shpalljes së datës 7 qershor 2026 për mbajtjen e zgjedhjeve të parakohshme për Kuvendin e Kosovës, mund t’iu konfirmoj se gjatë ditës së nesërme (e premte, 1 maj 2026), KQZ do të mbajë mbledhje për të marrë vendimet e para me qëllim të organizimit të këtyre zgjedhjeve”, tha Elezi.

Ai theksoi se, për shkak se bëhet fjalë për zgjedhje të parakohshme, organizimi i tyre do të zhvillohet me afate të shkurtuara.

“Një nga vendimet e para të KQZ-së për këtë proces zgjedhor do të jetë shkurtimi i afateve kohore të aktiviteteve zgjedhore apo përshtatja e tyre sipas nevojës dhe në pajtim me rrethanat”, deklaroi ai.

Sipas Elezit, plani i aktiviteteve zgjedhore do të përcaktojë afatet për formimin e koalicioneve, certifikimin e subjekteve politike, dorëzimin e listave të kandidatëve për deputetë, periudhën e fushatës zgjedhore, regjistrimin e votuesve jashtë Kosovës dhe akreditimin e vëzhguesve e mediave.

Ai bëri të ditur gjithashtu se KQZ do të miratojë edhe planifikimin buxhetor për organizimin e zgjedhjeve.

“Viti 2026 nuk është vit zgjedhor dhe në buxhetin vjetor të KQZ-së nuk janë paraparë mjete për zgjedhje të parakohshme. Në këto rrethana, KQZ do t’i drejtohet Qeverisë së Kosovës me kërkesë për mjetet e nevojshme për mbulimin e shpenzimeve”, përfundoi Elezi.